بِسْمِ اللهِ الرَّحْمٰنِ الرَّحِيمِ‎

29-سۈرە ئەنكەبۇت مەككەدە نازىل بولغان، 69 ئايەت

ئەلىف، لام، مىم.‏
1




ئىنسانلار: «ئىمان ئېيتتۇق» دېسەك، سىنالماي تەرك ئېتىلىمىز دەپ ئويلامدۇ؟‏
2




شۈبھىسىزكى، بىز ئۇلاردىن بۇرۇنقىلارنىمۇ سىنىغان. ئاللاھ راستچىللارنى ئوبدان بىلىدۇ، يالغانچىلارنىمۇ ئوبدان بىلىدۇ.‏
3




ياكى يامان ئىشلارنى قىلىۋاتقانلار ئاللاھتىن قېچىپ قۇتۇلىمىز دەپ ئويلامدۇ؟ ئۇلارنىڭ بۇ چۈشەنچىسى نېمىدېگەن يامان!‏
4




كىم ئاللاھقا مۇلاقات بولۇشنى ئۈمىد قىلسا، بىلسۇنكى ئاللاھ بەلگىلىگەن ۋاقىت چوقۇم يېتىپ كېلىدۇ. ئۇ ئاڭلاپ تۇرغۇچىدۇر، بىلىپ تۇرغۇچىدۇر.‏
5




كىم جىھاد قىلسا، ئۆزى ئۈچۈن جىھاد قىلىدۇ. ئاللاھ ئالەملەردىن بىھاجەتتۇر.‏
6




بىز ئىمان ئېيتىپ ياخشى ئەمەللەرنى قىلغانلارنىڭ يامانلىقلىرىنى يوققا چىقىرىمىز، ئۇلارنى قىلغان ئەمەللىرىنىڭ ئەڭ ياخشىسى بىلەن مۇكاپاتلايمىز.‏
7




بىز ئىنسانغا مۇنداق دەپ بۇيرۇق چۈشۈردۇق: ئاتا-ئاناڭغا ياخشىلىق قىلغىن. ئەگەر ئۇلار سېنى، سەن بىلمەيدىغان نەرسىنى ماڭا شېرىك قىلىشقا زورلىسا، ئۇلارغا ئىتائەت قىلمىغىن. ھەممىڭلار مېنىڭ ھۇزۇرىمغا قايتىسىلەر، ئاندىن مەن سىلەرگە قىلمىشىڭلارنى ئېيتىپ بېرىمەن.‏
8




بىز ئىمان ئېيتىپ ياخشى ئەمەللەرنى قىلغانلارنى ياخشىلار قاتارىغا كىرگۈزىمىز.‏
9




ئىنسانلاردىن شۇنداق كىشىلەرمۇ باركى، «ئاللاھقا ئىشەندۇق» دەيدۇ. لېكىن ئۇلار ئاللاھ يولىدا ئەزىيەتكە ئۇچرىسا ئىنسانلاردىن يەتكەن ئازارنى ئاللاھتىن كەلگەن ئازاب بىلەن ئوخشاش كۆرىدۇ. ئەگەر رەببىڭدىن زەپەر كەلسە «بىزمۇ سىلەر بىلەن بىللە ئىدۇق» دەيدۇ. ئاللاھ پۈتۈن ئالەم خەلقىنىڭ دىللىرىكى نەرسىلەرنى ئوبدان بىلىدىغان زات ئەمەسمۇ؟
10




ئاللاھ ئىمان ئېيتقانلارنى ئوبدان بىلىدۇ، مۇنافىقلارنىمۇ ئوبدان بىلىدۇ.‏
11




كافىرلار مۇئمىنلارغا: «بىزنىڭ يولىمىزغا كىرىڭلار، گۇناھىڭلارنى بىز ئۈستىمىزگە ئالايلى» دەيدۇ. ھالبۇكى، ئۇلار بۇلارنىڭ ھېچبىر گۇناھىنى ئۈستىگە ئالمايدۇ. ئۇلار ھەقىقەتەن يالغانچىلاردۇر.‏
12




ئۇلار ئۆزلىرىنىڭ ئېغىر يۈكلىرىنى، ئۆزلىرىنىڭ ئېغىر يۈكلىرى بىلەن بىرلىكتە باشقا نۇرغۇن ئېغىر يۈكلەرنى ئۈستىگە ئالىدۇ. ئۇلار ئويدۇرغان بوھتانلىرى توغرۇلۇق قىيامەت كۈنى سوراققا تارتىلىدۇ.‏
13




بىز نۇھنى قەۋمىگە ئەلچى قىلىپ ئەۋەتتۇق. نۇھ ئۇلارنىڭ ئىچىدە ئەللىك يىل كەم مىڭ يىل تۇردى[1]. ئاندىن ئۇلارنى سۇ تاشقىنى ھالاك قىلدى. ئۇلار بۇ ئەسنادا زۇلۇملىرىنى داۋاملاشتۇرماقتا ئىدى.‏
14




لېكىن بىز نۇھنى ۋە كېمىدىكىلەرنى قۇتقۇزدۇق، بۇنى ئالەملەر ئۈچۈن ئايەت قىلدۇق.‏
15




بىز ئىبراھىمنىمۇ ئەلچى قىلىپ ئەۋەتتۇق. ئۇ ئۆز ۋاقتىدا قەۋمىگە مۇنداق دېدى: «ئاللاھقا ئىبادەت قىلىڭلار، ئاللاھقا تەقۋادار بولۇڭلار. ئەگەر بىلسەڭلار، بۇ سىلەر ئۈچۈن ياخشىدۇر.‏
16




سىلەر ئاللاھنى قويۇپ پەقەت بۇتلارغىلا چوقۇنۇۋاتىسىلەر ۋە بوھتان توقۇۋاتىسىلەر. سىلەر ئاللاھنى قويۇپ چوقۇنۇۋاتقان زاتلار سىلەرگە رىزىق بېرەلمەيدۇ. ئۇنداقتا رىزىقنى ئاللاھنىڭ ھۇزۇرىدىن ئىزدەڭلار، ئاللاھقا چوقۇنۇڭلار ۋە ئاللاھقا شۈكۈر قىلىڭلار. سىلەر ئاللاھنىڭ ھۇزۇرىغا قايتۇرۇلىسىلەر.‏
17




ئەگەر راستنى يالغان دېسەڭلار، سىلەردىن بۇرۇنقى ئۇممەتلەرمۇ راستنى يالغان دېگەن ئىدى. ئەلچىنىڭ روشەن تەبلىغ قىلىشتىن باشقا ۋەزىپىسى يوق».‏
18




ئۇلار ئاللاھنىڭ يارىتىشنى قانداق باشلايدىغانلىقىنى، ئاندىن ئۇنى قانداق تەكرارلايدىغانلىقىنى كۆرمىدىمۇ؟ بۇ ئاللاھقا ناھايىتى ئاساندۇر.‏
19




ئېيتقىنكى: «يەر يۈزىدە سەير قىلىپ، ئاللاھنىڭ يارىتىشنى قانداق باشلىغانلىقىنى كۆزىتىڭلار! ئاللاھ كەلگۈسىدە بۇ يارىتىشنى يەنە بىر قېتىم تەكرارلايدۇ. ئاللاھ ھەر نەرسىگە قادىردۇر.‏
20




ئاللاھ خالىغان كىشىنى ئازابلايدۇ، خالىغان كىشىگە مەرھەمەت قىلىدۇ. سىلەر ئۇنىڭ ھۇزۇرىغا ئېلىپ بېرىلىسىلەر.‏
21




سىلەر زېمىندا بولسۇن، ئاسماندا بولسۇن ھېچبىر يەردە ئاللاھتىن قېچىپ قۇتۇلالمايسىلەر. سىلەرگە ئاللاھتىن باشقا ۋەلىي ۋە ياردەمچى يوقتۇر».‏
22




ئاللاھنىڭ ئايەتلىرىنى ۋە ئاللاھقا مۇلاقات بولۇشنى ئىنكار قىلغانلار رەھمىتىمدىن ئۈمىدىنى ئۈزگەنلەردۇر. ئۇلارغا ئەلەملىك ئازاب بار.‏
23




قەۋمىنىڭ ئىبراھىمغا بىردىنبىر جاۋابى شۇ بولدى: «ئۇنى ئۆلتۈرۈڭلار ياكى كۆيدۈرۈڭلار». لېكىن ئاللاھ ئىبراھىمنى ئوتتىن قۇتقۇزدى. شۈبھىسىزكى، بۇنىڭدا ئىشىنىدىغان قەۋم ئۈچۈن ئايەتلەر بار.‏
24




ئىبراھىم ئۇلارغا يەنە مۇنداق دېدى: «سىلەر بۇ دۇنيا ھاياتىدا ئاراڭلاردىكى دوستلۇقنى دەپلا ئاللاھنى قويۇپ بۇتلارغا چوقۇنۇۋاتىسىلەر. ئاندىن كېيىن قىيامەت كۈنى بىر-بىرىڭلارنى ئىنكار قىلىسىلەر، بىر-بىرىڭلارغا لەنەت ئوقۇيسىلەر. سىلەرنىڭ بېرىپ ئورۇنلىشىدىغان يېرىڭلار دوزاختۇر. سىلەرگە ھېچ ياردەمچى يوقتۇر».‏
25




شۇنىڭ بىلەن ئىبراھىمغا لۇت ئىشەندى. ئىبراھىم: «مەن رەببىمگە ھىجرەت قىلىمەن. شۈبھىسىزكى، ئۇ ئەزىزدۇر، ھېكمەت بىلەن ئىش قىلغۇچىدۇر» دېدى.‏
26




بىز ئۇنىڭغا ئىسھاقنى ۋە يەئقۇبنى ئاتا قىلدۇق، نەبىيلىكنى ۋە كىتابنى ئۇنىڭ نەسلىگە بەردۇق. ئۇنى دۇنيادا مۇكاپاتلىدۇق. ئۇ ئاخىرەتتىمۇ چوقۇم ياخشىلاردىن بولىدۇ.‏
27




بىز لۇتنىمۇ ئەلچى قىلىپ ئەۋەتتۇق. ئۇ ئۆز ۋاقتىدا قەۋمىگە مۇنداق دېگەن ئىدى: «سىلەر ھازىرغىچە پۈتۈن ئالەم ئىچىدىن ھېچكىم قىلمىغان قەبىھ ئىشنى قىلىۋاتىسىلەر.‏
28




سىلەر ئەرلەر بىلەن بىر يەردە بولۇۋاتىسىلەر، نەسىلنىڭ يولىنى ئۈزۈۋاتىسىلەر، سورۇنلىرىڭلاردا يامان ئىشلارنى قىلىۋاتىسىلەر، شۇنداق ئەمەسمۇ!» شۇنىڭ بىلەن قەۋمىنىڭ لۇتقا بەرگەن بىردىنبىر جاۋابى شۇ بولدى: «ئەگەر راستچىللاردىن بولساڭ، بىزگە ئاللاھنىڭ ئازابىنى كەلتۈرگىن!».‏
29




لۇت: «رەببىم! بۇ بۇزغۇنچى قەۋمگە قارشى ماڭا ياردەم قىلغىن» دېدى.‏
30




ئەلچىلىرىمىز ئىبراھىمغا خۇش خەۋەرنى ئېلىپ كەلگەن چاغدا: «بىز شۇ يۇرت ئاھالىسىنى چوقۇم ھالاك قىلىمىز. چۈنكى ئۇ يۇرتنىڭ ئاھالىسى ھەقىقەتەن زالىم بولدى» دېدى.‏
31




ئىبراھىم: «ئۇ يەردە لۇت بارغۇ!» دېدى. ئۇلار: «بىز ئۇ يەردە كىمنىڭ بارلىقىنى ئوبدان بىلىمىز. بىز لۇتنى ۋە ئۇنىڭ ئەھلىنى قۇتقۇزىمىز. لېكىن ئۇنىڭ ئايالى ئارقىدا قېلىپ ھالاك بولغۇچىلاردىن بولىدۇ» دېدى.‏
32




ئەلچىلىرىمىز لۇتنىڭ يېنىغا كەلگەندە، لۇت ئۇلار توغرۇلۇق قايغۇردى ۋە ئىچى پۇشتى. شۇنىڭ بىلەن ئەلچىلىرىمىز مۇنداق دېدى: «قورقمىغىن ۋە قايغۇرمىغىن. بىز سېنى ۋە ئەھلىڭنى قۇتقۇزىمىز. لېكىن ئايالىڭ ئارقىدا قېلىپ ھالاك بولغۇچىلاردىن بولىدۇ.‏
33




بىز شۇ يۇرتنىڭ ئاھالىسى ئۈستىگە ئاسماندىن بالا چۈشۈرىمىز. چۈنكى ئۇلار فاسىق بولدى».‏
34




بىز ئۇ يۇرتتىن، ئەقلىنى ئىشلىتىدىغان قەۋمگە روشەن ئايەت قالدۇردۇق.‏
35




بىز مەديەن ئاھالىسىگە ئۆزلىرىنىڭ قېرىندىشى شۇئەيبنى ئەلچى قىلىپ ئەۋەتتۇق. ئۇ مۇنداق دېدى: «ئى قەۋمىم! ئاللاھقا ئىبادەت قىلىڭلار، ئاخىرەت كۈنىنى ئۈمىد قىلىڭلار، بۇ زېمىندا بۇزغۇنچىلىق قىلىپ، قالايمىقانچىلىق چىقارماڭلار».‏
36




لېكىن ئۇلار شۇئەيبنى يالغانچى دېيىشتى. شۇنىڭ بىلەن ئۇلارنى دەرھال ئۇ شىددەتلىك زىلزىلە باستى- دە، تۇرغان يەرلىرىدە دۈم چۈشۈپ قېتىپ قالدى.‏
37




بىز ئاد ۋە سەمۇد قەۋملىرىنى ھالاك قىلدۇق. بۇنى سىلەرگە ئۇلارنىڭ تۇرالغۇ جايلىرى ئېنىق كۆرسىتىدۇ. شەيتان ئۇلارغا ئەمەللىرىنى چىرايلىق كۆرسىتىپ، ئۇلارنى توغرا يولدىن توسقان ئىدى. ھالبۇكى، ئۇلار بۇنى چۈشىنىدىغان كىشىلەر ئىدى.‏
38




قارۇن، فىرئەۋن ۋە ھاماننىڭ ئاقىۋىتىمۇ شۇنداق بولدى. مۇسا ئۇلارغا روشەن دەلىللەرنى ئېلىپ كەلگەن ئىدى. ئۇلار زېمىندا چوڭچىلىق قىلدى. لېكىن بىزدىن قېچىپ قۇتۇلالمىدى.‏
39




بىز ئۇلارنىڭ ھەر بىرىنى ئۆز گۇناھى سەۋەبىدىن جازالىدۇق: ئۇلارنىڭ بەزىسىگە تاشلار ياغدۇرىدىغان قاتتىق بوران ئەۋەتتۇق، بەزىسىنى قاتتىق ئاۋاز ھالاك قىلدى، بەزىسىنى يەرگە يۇتقۇزۇۋەتتۇق، بەزىسىنى غەرق قىلدۇق. ئاللاھ ئۇلارغا ھەرگىزمۇ زۇلۇم قىلمىدى، لېكىن ئۇلار ئۆزلىرىگە ئۆزلىرى زۇلۇم قىلدى.‏
40




ئاللاھتىن غەيرىينى ۋەلىي قىلىۋالغانلارنىڭ ئەھۋالى، ئۆي تۇتقان چىشى ئۆمۈچۈكنىڭ ئەھۋالىغا ئوخشايدۇ. شۈبھىسىزكى، ئۆيلەرنىڭ ئەڭ ئاجىزى چوقۇم چىشى ئۆمۈچۈكنىڭ ئۆيىدۇر. ئۇلار بۇنى بىلگەن بولسىچۇ!‏
41




ئاللاھ ئۇلارنىڭ ئاللاھنى قويۇپ دۇئا قىلىۋاتقان نەرسىسىنى ئوبدان بىلىدۇ. ئاللاھ ئەزىزدۇر، ھېكمەت بىلەن ئىش قىلغۇچىدۇر.‏
42




ئەنە مىساللار! بىز ئۇلارنى ئىنسانلارغا بايان قىلىۋاتىمىز. لېكىن بۇ مىساللارنى ئالىملاردىن باشقىسى چۈشىنەلمەيدۇ.‏
43




ئاللاھ ئاسمانلارنى ۋە زېمىننى ھەق بىلەن ياراتتى. بۇنىڭدا مۇئمىنلار ئۈچۈن ئايەت بار.‏
44




ئى مۇھەممەد! سەن ئۆزۈڭگە ۋەھىي قىلىنغان كىتابنى تىلاۋەت قىلغىن، نامازنى تولۇق ۋە داۋاملىق ئۆتىگىن. شۈبھىسىزكى، ناماز قەبىھ سۆز-ھەرىكەتلەردىن ۋە يامان ئىشلاردىن توسىدۇ. ئاللاھنىڭ زىكرى ئەڭ بۈيۈكتۇر. ئاللاھ قىلمىشىڭلارنى بىلىدۇ.‏
45




ئەھلى كىتاب بىلەن ئەڭ چىرايلىق رەۋىشتە مۇنازىرىلىشىڭلار- ئۇلاردىن زۇلۇم قىلغانلار بۇنىڭدىن مۇستەسنا-، مۇنداق دەڭلار: «بىز، بىزگە نازىل قىلىنغان ۋە سىلەرگە نازىل قىلىنغان كىتابقا ئىمان ئېيتتۇق. بىزنىڭ ئىلاھىمىز ۋە سىلەرنىڭ ئىلاھىڭلار بىردۇر. بىز ئۇنىڭغا تەسلىم بولغۇچىلارمىز».‏
46




ئى مۇھەممەد! بىز ساڭىمۇ بۇ كىتابنى نازىل قىلدۇق. بىز كىتاب بەرگەنلەر بۇنىڭغا ئىشىنىدۇ. شۇلاردىنمۇ ئۇنىڭغا ئىشىنىدىغانلار بار. بىزنىڭ ئايەتلىرىمىزنى پەقەت كافىرلارلا ئىنكار قىلىدۇ.‏
47




سەن بۇنىڭدىن ئىلگىرى ئوقۇشنىمۇ بىلمەيتتىڭ، يېزىشنىمۇ ئىدىڭ. ئۇنداق بولسا ئىدى، باتىل تەرەپدارلىرى شۈبھىلىنەتتى.‏
48




بەلكى قۇرئان، ئىلىم بېرىلگەنلەرنىڭ دىللىرىدا ساقلىنىدىغان روشەن ئايەتلەردۇر. بىزنىڭ ئايەتلىرىمىزنى پەقەت زالىملارلا ئىنكار قىلىدۇ.‏
49




ئۇلار: «نېمىشقا ئۇنىڭغا رەببىدىن ئايەتلەر چۈشۈرۈلمىدى؟» دەيدۇ. ئېيتقىنكى: «ئايەتلەر ئاللاھنىڭ ھۇزۇرىدىدۇر. مەن بولسام ئوپئوچۇق بىر ئاگاھلاندۇرغۇچىمەن».‏
50




ئۇلارغا تىلاۋەت قىلىنىۋاتقان بۇ كىتابنى ساڭا نازىل قىلىشىمىز، ئۇلارغا كۇپايە قىلمىدىمۇ؟ ئۇنىڭدا ئىشىنىدىغان قەۋم ئۈچۈن رەھمەت ۋە ئەسلىتىش بار.‏
51




ئېيتقىنكى: «ئارىمىزدا ئاللاھ يېتەرلىك شاھىتتۇر. ئۇ، ئاسمانلاردىكى ۋە زېمىندىكى نەرسىلەرنى بىلىدۇ. باتىلغا ئىشىنىپ ئاللاھقا كافىر بولغانلار چوقۇم زىيان تارتقۇچىلاردۇر.‏
52




ئۇلار سەندىن باشلىرىغا كېلىشى ۋەدە قىلىنغان ئازابنىڭ تېز كېلىشىنى تەلەپ قىلىدۇ. ئەگەر بەلگىلەنگەن ئەجەل بولمىسا ئىدى، ئازاب ئۇلارغا ئەلۋەتتە كەلگەن بولاتتى. ئازاب ئۇلارغا ئۇشتۇمتۇت كېلىدۇ. ئۇلار تۇيماي قالىدۇ.‏
53




شۇنداق، ئۇلار سەندىن باشلىرىغا كېلىشى ۋەدە قىلىنغان ئازابنىڭ تېز كېلىشىنى تەلەپ قىلىدۇ. ئۇلار شۇنى بىلىپ قويسۇنكى، جەھەننەم كافىرلارنى قورشاپ تۇرماقتىدۇر.‏
54




ئۇ كۈنى ئازاب ئۇلارنى ئۈستىلىرىدىن ۋە ئاياغلىرىنىڭ ئاستىلىرىدىن ئورىۋالىدۇ. ئاللاھ ئۇلارغا: «قىلمىشلىرىڭلارنىڭ جازاسىنى تېتىڭلار!» دەيدۇ.‏
55




ئى مۇئمىن بەندىلىرىم! مېنىڭ زېمىنىم ھەقىقەتەن كەڭدۇر. ئۇنداقتا پەقەت ماڭىلا ئىبادەت قىلىڭلار.‏
56




ھەر نەفس ئۆلۈمنى تېتىغۇچىدۇر. ئاندىن ھۇزۇرىمىزغا قايتۇرۇلىسىلەر.‏
57




بىز ئىمان ئېيتىپ ياخشى ئەمەللەرنى قىلغانلارنى جەننەتنىڭ ئالىي سارايلىرىغا ئورۇنلاشتۇرىمىز. ئۇ سارايلارنىڭ ئاستىدىن ئۆستەڭلەر ئېقىپ تۇرىدۇ. ئۇلار ئۇ سارايلاردا مەڭگۈ قالىدۇ. ئەمەل قىلغۇچىلارنىڭ مۇكاپاتى نېمىدېگەن ياخشى!‏
58




ئۇلار سەۋر قىلغان ۋە رەببىگىلا تەۋەككۇل قىلىدىغان كىشىلەردۇر. ‏
59




رىزقىنى كۆتۈرۈپ يۈرمەيدىغان نۇرغۇنلىغان جانلىقلار بار. ئۇلارغا ۋە سىلەرگە ئاللاھ رىزىق بەرمەكتىدۇر. ئاللاھ ئاڭلاپ تۇرغۇچىدۇر، بىلىپ تۇرغۇچىدۇر.‏
60




ئەگەر ئۇلاردىن: «ئاسمانلارنى ۋە زېمىننى ياراتقان، قۇياشنى ۋە ئاينى بويسۇندۇرغان كىمدۇر؟» دەپ سورىساڭ، ئۇلار چوقۇم: «ئاللاھ» دەيدۇ. شۇنداق تۇرۇقلۇق ئۇلار قانداقمۇ بۇرۇلۇپ كېتىدىغاندۇ؟
61




ئاللاھ خالىغان بەندىسىنىڭ رىزقىنى كەڭ قىلىدۇ، خالىغان بەندىسىنىڭ رىزقىنى تار قىلىدۇ. چۈنكى ئۇ ھەر نەرسىنى بىلگۈچىدۇر.‏
62




ئۇلاردىن «ئاسماندىن سۇ چۈشۈرۈپ، ئۇنىڭ بىلەن ئۆلۈك زېمىننى تىرىلدۈرگەن كىمدۇر؟» دەپ سورىساڭ، ئۇلار چوقۇم: «ئاللاھ» دەيدۇ. ئېيتقىنكى: «ئەلھەمدۇ لىللاھ!». بەلكى ئۇلارنىڭ تولىسى ئەقىللىرىنى ئىشلەتمەيدۇ.‏
63




بۇ دۇنيا ھاياتى ئويۇن-تاماشادىنلا ئىبارەتتۇر. ئاخىرەت يۇرتىدىكى ھايات بولسا، ھەقىقىي ھاياتتۇر. ئۇلار بىلگەن بولسىچۇ.‏
64




ئۇلار كېمىگە چىققان چاغلىرىدا، ئاللاھقا دىننى خالىس قىلغان ھالدا دۇئا قىلىدۇ. لېكىن ئاللاھ ئۇلارنى قۇتقۇزۇپ، قۇرۇقلۇققا چىقىرىپ قويسا دەرھال شېرىك كەلتۈرىدۇ.‏
65




ئۇلار بىز ئاتا قىلغان نېمەتلەرگە تۇزكورلۇق قىلىپ تۇرسۇن، ئويناپ تۇرسۇن. پات يېقىندا بىلىپ قالىدۇ.‏
66




ئۇلار بىزنىڭ مەككىنى ھۆرمەتلىك ۋە بىخەتەر شەھەر قىلغانلىقىمىزنى كۆرمىدىمۇ؟ ھالبۇكى، ئۇلارنىڭ ئەتراپىدا ياشايدىغان ئىنسانلار تۇتۇلۇپ ئەسىر ئېلىنىۋاتىدۇ. ئۇلار يەنىلا باتىلغا ئىشىنىپ، ئاللاھنىڭ نېمەتلىرىگە تۇزكورلۇق قىلامدۇ؟
67




ئاللاھقا يالغان چاپلىغان ياكى ئۆزىگە كەلگەن ھەقنى يالغان دېگەن ئادەمدىنمۇ زالىم ئادەم بارمۇ؟ كافىرلارنىڭ جايى جەھەننەمدۇر، شۇنداق ئەمەسمۇ!‏
68




بىزنىڭ يولىمىزدا جىھاد قىلغانلارغا كەلسەك، بىز ئۇلارنى ئەلۋەتتە يوللىرىمىزغا يېتەكلەيمىز. شۈبھىسىزكى، ئاللاھ ياخشى ئىش قىلغۇچىلار بىلەن بىللىدۇر.‏
69