بِسْمِ اللهِ الرَّحْمٰنِ الرَّحِيمِ‎

38-سۈرە ساد مەككەدە نازىل بولغان، 88 ئايەت

ساد. زىكىر مەنبەسى بولغان قۇرئان بىلەن قەسەمكى،‏
1




ئىش كافىرلار دېگەندەك ئەمەس، بەلكى كافىرلار مەغرۇرلانماقتا ۋە قارشى تۇرماقتا.‏
2




بىز ئۇلاردىن ئىلگىرى نۇرغۇن نەسىللەرنى ھالاك قىلدۇق. ئۇلار ئازابىمىزنى كۆرۈپ پەرياد قىلىشتى، لېكىن زامان قېچىپ قۇتۇلۇش زامانى ئەمەس ئىدى.‏
3




ئۇلار ئۆزلىرىگە ئۆز ئىچىدىن ئاگاھلاندۇرغۇچى كەلگەنلىكىگە ئەجەبلەندى ۋە ئۇ كافىرلار مۇنداق دېيىشتى: «شۇ مۇھەممەد سېھىرگەردۇر، يالغانچىدۇر.‏
4




ئۇ ئىلاھلارنى يالغۇز بىر ئىلاھ قىلدىمۇ؟ بۇ ھەقىقەتەن ئەجەبلىنەرلىك ئىشتۇر».‏
5




ئۇلارنىڭ كاتتىلىرى مۇنۇ سۆزلەرنى قىلىشقان ھالدا يۈرۈشتى: «مېڭىڭلار ۋە ئىلاھلىرىڭلارغا چوقۇنۇشتا چىڭ تۇرۇڭلار. شۈبھىسىزكى، ئۇ ئىرادە قىلىنىدىغان نەرسىدۇر.‏
6




بىز بۇ تەۋھىد ئېتىقادىنى ئاخىرقى دىندىمۇ ئاڭلىمىدۇق. بۇ بىر ئويدۇرمىدىنلا ئىبارەتتۇر.‏
7




قۇرئان ئارىمىزدىن ئۇنىڭغا نازىل قىلىنىپتۇمۇ؟». بەلكى ئۇلار قۇرئاندىن قاتتىق شەك قىلماقتىدۇر. بەلكى ئۇلار ئازابىمنى تېخى تېتىمىدى.‏
8




ياكى ئەزىز ۋە ناھايىتى كەرەملىك رەببىڭنىڭ رەھمەت خەزىنىلىرى ئۇلارنىڭ يېنىدىمۇ؟
9




ياكى ئۇلار ئاسمانلارنىڭ، زېمىننىڭ ۋە ئۇ ئىككىسىنىڭ ئارىسىدىكى نەرسىلەرنىڭ ئىگىلىرىمۇ؟ ئەگەر ئۇنداق بولسا ئۇلار سەۋەبلەردە يۈكسەلسۇن.‏
10




ئۇلار ئۇ يەردە بىر قوشۇندۇر، يېڭىلگۈچىدۇر، گۇرۇھلاردىن بىر گۇرۇھتۇر. ‏
11




بۇلاردىن ئىلگىرى نۇھ قەۋمى، ئاد ۋە قوزۇقلارنىڭ ئىگىسى فىرئەۋن راستنى يالغان دېگەن ئىدى.‏
12




سەمۇد، لۇت قەۋمى ۋە ئەيكەلىكلەرمۇ شۇنداق قىلغان. ئەنە شۇلار ئەلچىلىرىمگە قارشى ئۇيۇشقان گۇرۇھلار ئىدى.‏
13




ئۇلارنىڭ ھەممىسى ئەلچىلىرىمنى يالغانچى دېدى. بۇ سەۋەبتىن ئۇلارغا ئازابىم تېگىشلىك بولدى.‏
14




بۇلار دەھشەتلىك ئاۋازنىلا كۈتۈپ تۇرۇۋاتىدۇ. ئۇ ۋاقتىدىن قىلچە كېچىكمەيدۇ.‏
15




ئۇلار: «رەببىمىز! بىزنىڭ ئازابتىن نېسىۋىمىزنى تېزلىتىپ ھېساب كۈنىدىن بۇرۇن بەرگىن» دېدى.‏
16




ئى مۇھەممەد! ئۇلارنىڭ سۆزلىرىگە سەۋر قىلغىن، كۈچلۈك بەندىمىز داۋۇدنى زىكىر قىلغىن. ئۇ داۋاملىق بىزگە يۆنىلەتتى.‏
17




بىز تاغلارنى كۈندۈزنىڭ ئاخىرىدا ۋە كۈن چىقىپ نۇر چاچقاندا داۋۇد بىلەن بىرلىكتە تەسبىھ ئېيتىشقا بويسۇندۇردۇق.‏
18




توپلانغان قۇشلارنىمۇ بويسۇندۇردۇق. ھەممىسى ئۇنىڭغا ئەگىشىپ بىزگە يۆنىلەتتى.‏
19




بىز ئۇنىڭ ھاكىمىيىتىنى كۈچلەندۈردۇق. ئۇنىڭغا ھېكمەت، توغرا ھۆكۈم چىقىرىش ۋە ياخشى سۆز قىلىش قابىلىيىتىنى بەردۇق.‏
20




ساڭا دەۋاچىلارنىڭ خەۋىرى كەلدىمۇ؟ ئۇلار ئۆز ۋاقتىدا ئىبادەتخانىنىڭ تېمىدىن ئاتلاپ،‏
21




داۋۇدنىڭ يېنىغا ئۇشتۇمتۇت كىرگەن ئىدى، داۋۇد ئۇلاردىن قورقتى. ئۇلار مۇنداق دېدى: «قورقمىغىن، بىز بىر-بىرىمىزگە زۇلۇم قىلغان ئىككى دەۋاگەرمىز. بىزنىڭ ئارىمىزدا ھەق بىلەن ھۆكۈم قىلغىن، زۇلۇم قىلمىغىن ۋە بىزنى توغرا يولغا باشلىغىن»،‏
22




ئۇلارنىڭ بىرى مۇنداق دېدى: «بۇ مېنىڭ قېرىندىشىم بولىدۇ، بۇنىڭ توقسان توققۇز تۇياق ساغلىقى بار، مېنىڭ بىر تۇياق ساغلىقىم بار. بۇ قېرىندىشىم ئۇ ساغلىقنىمۇ ماڭا بەرگىن دېدى ۋە مېنى سۆزدە يەڭدى».‏
23




داۋۇد مۇنداق دېدى: «بۇ قېرىندىشىڭ، سېنىڭ بىر ساغلىقىڭنى ئۆزىنىڭ ساغلىقلىرىغا قوشۇۋېلىشنى سوراپ، ساڭا ھەقىقەتەن زۇلۇم قىلىپتۇ. شۈبھىسىزكى، شېرىكلەرنىڭ تولىسى بىر-بىرىگە ھەقسىزلىق قىلماقتىدۇر. ئىمان ئېيتىپ ياخشى ئەمەللەرنى قىلغانلار بۇنىڭدىن مۇستەسنا، لېكىن ئۇلار بەك ئازدۇر». داۋۇد ئۆزىنى بىزنىڭ سىنىغانلىقىمىزنى چۈشەندى، دەرھال رەببىدىن مەغپىرەت تىلىدى، ئېگىلىپ سەجدىگە يىقىلدى ۋە رەببىگە يۆنەلدى.‏
24




شۇنىڭ بىلەن بىز ئۇنىڭ خاتالىقىنى مەغپىرەت قىلدۇق. ئۇنى ھۇزۇرىمىزدا ئۆزىمىزگە يېقىنلاشتۇرىمىز ۋە ياخشى ئاقىۋەتكە ئىگە قىلىمىز.‏
25




ئۇنىڭغا مۇنداق دېدۇق: «ئى داۋۇد! بىز سېنى زېمىندا خەلىپە قىلدۇق[1]. شۇنىڭ ئۈچۈن ئىنسانلارنىڭ ئارىسىدا ھەق بىلەن ھۆكۈم قىلغىن، نەپسى خاھىشىڭغا ئەگەشمىگىن. ئەگەر نەپسى خاھىشىڭغا ئەگەشسەڭ، نەپسى خاھىشىڭ سېنى ئاللاھنىڭ يولىدىن ئازدۇرىدۇ. ئاللاھنىڭ يولىدىن ئازغانلار ھېساب كۈنىنى ئۇنتۇغانلىقى ئۈچۈن قاتتىق ئازابقا دۇچار بولىدۇ».‏
26




بىز ئاسماننى، زېمىننى ۋە ئۇ ئىككىسىنىڭ ئارىسىدىكى نەرسىلەرنى بىكار ياراتمىدۇق. ئۇلارنى بىكار يارىتىلغان دەپ قاراش كافىرلارنىڭ گۇمانىدۇر. بۇ سەۋەبتىن ئۇ كافىرلارنىڭ ھالىغا ۋاي! چۈنكى ئۇ كافىرلار دوزاخقا كىرىدۇ.‏
27




ياكى بىز ئىمان ئېيتىپ ياخشى ئەمەللەرنى قىلغانلارنى زېمىندا بۇزغۇنچىلىق قىلغۇچىلار بىلەن ئوخشاش كۆرەمدۇق؟ ياكى تەقۋادارلارنى گۇناھكارلار بىلەن ئوخشاش كۆرەمدۇق؟‏
28




ئى مۇھەممەد! بۇ بەرىكەتلىك كىتابتۇر. بىز ئۇنى ئىنسانلار ئايەتلىرى ئۈستىدە تەدەببۇر[2] قىلسۇن ۋە ساپ ئەقىل ئىگىلىرى ئويلانسۇن دەپ ساڭا نازىل قىلدۇق.‏
29




بىز داۋۇدقا سۇلەيماننى ئاتا قىلدۇق. سۇلەيمان بەك ياخشى بەندە ئىدى. چۈنكى ئۇ داۋاملىق بىزگە يۆنىلەتتى.‏
30




كەچقۇرۇندا ئۇنىڭ ئالدىدىن ئېسىل ۋە يۈگۈرۈك ئاتلىرى ئۆتكۈزۈلگەن ئىدى.‏
31




ئۇ: «مەن بۇ ياخشى ماللارنى رەببىمنى ئەسلەتكەنلىكى ئۈچۈن ياخشى كۆردۈم» دېدى. ئۇ بۇ سۆزلەرنى ئاتلار كۆزىدىن غايىب بولغۇچە تەكرارلاپ تۇردى.‏
32




ئۇ: «ئاتلارنى ئالدىمدىن يەنە بىر قېتىم ئۆتكۈزۈڭلار» دېدى، ئاندىن ئاتلارنىڭ پاچاقلىرىنى ۋە بويۇنلىرىنى سىلاشقا باشلىدى.‏
33




بىز سۇلەيماننى سىنىدۇق، ئۇنىڭ تەختى ئۈستىگە بىر جەسەت تاشلىدۇق. ئاندىن ئۇ بىزگە يۆنەلدى.‏
34




ئۇ مۇنداق دېدى: «رەببىم! مېنى ئەپۇ قىلغىن، ماڭا مەندىن كېيىن ھېچكىمگە نېسىپ بولمايدىغان بىر پادىشاھلىق ئاتا قىلغىن، سەن ناھايىتى كۆپ ئاتا قىلغۇچىسەن».‏
35




شۇنىڭ بىلەن بىز ئۇنىڭغا شامالنى بويسۇندۇرۇپ بەردۇق. شامال ئۇنىڭ بۇيرۇقى بويىچە ئۇ خالىغان يەرگە سىلىق ماڭاتتى.‏
36




بىز ئۇنىڭغا يەنە بىناكار ۋە غەۋۋاس شەيتانلارنىڭ ھەممىسىنى
37




ۋە زەنجىرلەر بىلەن باغلانغان باشقىلارنى بويسۇندۇرۇپ بەردۇق.‏
38




«بۇ بىزنىڭ ئىنئامىمىزدۇر، باشقىلارغا بەرگىن ياكى بەرمىگىن، ھېسابى ئېلىنمايدۇ».‏
39




شۈبھىسىزكى، ئۇنىڭغا ھۇزۇرىمىزدا يېقىنلىق ۋە ياخشى ئاقىۋەت بار.‏
40




بەندىمىز ئەييۇبنى زىكىر قىلغىن، ئۇ ئۆز ۋاقتىدا رەببىگە: «شەيتان ماڭا بىر ھارغىنلىق ۋە بىر ئازاب يەتكۈزدى» دەپ نىدا قىلغان ئىدى.‏
41




ئۇنىڭغا «پۇتۇڭنى يەرگە ئۇرغىن، ئەنە سوغۇق سۇ! يۇيۇنىسەن ۋە ئىچىسەن» دېدۇق.‏
42




بىز ئۇنىڭغا ئائىلىسىنى ۋە ئائىلىسىنىڭ بىر ئوخشىشىنى ئاتا قىلدۇق. بۇنى ئۇنىڭغا مەرھەمەت قىلىش ۋە ئۇنى ساپ ئەقىل ئىگىلىرىگە ئۈلگە قىلىش ئۈچۈن قىلدۇق.‏
43




ئۇنىڭغا يەنە: «قولۇڭغا بىر باغلام چۆپ ئېلىپ ئۇنىڭ بىلەن ئۇرغىن، گۇناھكار بولمىغىن» دېدۇق. بىز ئۇنى سەۋرچان كۆردۇق. ئۇ بەك ياخشى بەندە ئىدى. چۈنكى داۋاملىق بىزگە يۆنىلەتتى.‏
44




بەندىلىرىمىز ئىبراھىم، ئىسھاق ۋە يەئقۇبلارنىمۇ زىكىر قىلغىن، ئۇلار كۈچلۈك ۋە ئاڭلىق كىشىلەر ئىدى.‏
45




بىز ئۇلارنى ئاخىرەتنى ئويلاپ تۇرۇش ئالاھىدىلىكىگە ئىگە قىلدۇق.‏
46




شۈبھىسىزكى، ئۇلار ھۇزۇرىمىزدا تاللانغانلاردىن ۋە ياخشىلاردىندۇر.‏
47




ئىسمائىل، ئەليەسەئ ۋە زۇلكىفلىلەرنىمۇ زىكىر قىلغىن، ئۇلارنىڭ ھەممىسى ياخشىلاردىن ئىدى.‏
48




بۇ زىكىردۇر. شۈبھىسىزكى، تەقۋادارلارغا ئەلۋەتتە ياخشى ئاقىۋەت بار:‏
49




ئىشىكلىرى ئۇلار ئۈچۈن ئىچىلىدىغان ئەدن جەننەتلىرى.‏
50




ئۇلار ئۇ جەننەتلەردە تەختلەرنىڭ يۆلەنچۈكلىرىگە يۆلۈنۈپ ئولتۇرىدۇ. ئۇلار ئۇ جەننەتلەردە كۆپ مېۋە ۋە ئىچىلىدىغان نەرسە تەلەپ قىلىدۇ.‏
51




ئۇلارنىڭ يېنىدا كۆزلىرىنى ئۇلاردىن ئايرىمايدىغان تەڭتۇش قىزلار بار.‏
52




سىلەر، سىلەرگە ۋەدە قىلىنغان بۇ نەرسىلەرگە ھېساب كۈنى ئېرىشىسىلەر.‏
53




شۈھىسىزكى، ئۇ بىز بېرىدىغان رىزىقتۇر. ئۇ ھېچ تۈگىمەيدۇ.‏
54




بۇ مۇشۇنداقتۇر. ھەددىدىن ئاشقۇچىلارغا ئەلۋەتتە يامان ئاقىۋەت بار:‏
55




جەھەننەم. ئۇلار ئۇنىڭغا كىرىپ كۆيىدۇ. ئۇ نېمىدېگەن يامان تۆشەك!‏
56




ئۇلار بۇنى تېتىسۇن. ئۇ قايناقسۇ، يىرىڭ‏
57




ۋە ئۇ خىلدىكى تۈرلۈك ئازابلاردۇر.‏
58




ئۇلارنىڭ ئەگەشتۈرگۈچىلىرىگە: «بۇ سىلەر بىلەن بىللە ھەقىقەتكە قارشى چىققۇچى گۇرۇھتۇر» دېيىلىدۇ. ئەگەشتۈرگۈچىلەر: «ئۇلار راھەت يۈزى كۆرمىگەي! چۈنكى ئۇلار دوزاخقا كىرگۈچىلەردۇر» دەيدۇ.‏
59




ئەگەشكۈچىلەر: «ياق! سىلەر راھەت يۈزى كۆرمىگەيسىلەر! بۇنى بىزنىڭ ئالدىمىزغا سىلەر ئېلىپ كەلدىڭلار. بۇ نېمىدېگەن يامان قارارگاھ!» دەيدۇ.‏
60




ئەگەشكۈچىلەر يەنە: «رەببىمىز! بۇنى بىزنىڭ ئالدىمىزغا كىم ئېلىپ كەلگەن بولسا، ئۇنىڭ دوزاختىكى ئازابىنى بىر ھەسسە زىيادە قىلغىن» دەيدۇ.‏
61




ئەگەشتۈرگۈچىلەر مۇنداق دەيدۇ: «بىزگە نېمە بولدىكىن، بىز دۇنيادا يامانلاردىن ھېسابلىغان ئادەملەرنى كۆرمەيۋاتىمىز؟
62




بىز ئۇلارنى مەسخىرە قىلدۇقمۇ؟ ياكى كۆزلىرىمىز ئۇلاردىن ئېغىپ كەتتىمۇ؟».‏
63




ئەنە شۇ ھەقتۇر، دوزاخ ئەھلىنىڭ جاڭجاللىشىشىدۇر.‏
64




ئېيتقىنكى: «مەن پەقەتلا ئاگاھلاندۇرغۇچىمەن. ئاللاھتىن باشقا ھېچ ئىلاھ يوقتۇر. ئۇ بىردۇر، چەكسىز قۇدرەتلىكتۇر،
65




ئاسمانلارنىڭ، زېمىننىڭ ۋە ئۇ ئىككىسىنىڭ ئارىسىدىكى نەرسىلەرنىڭ رەببىدۇر، ئەزىزدۇر، كۆپ مەغپىرەت قىلغۇچىدۇر».‏
66




ئېيتقىنكى: «بۇ چوڭ خەۋەردۇر.‏
67




سىلەر بۇنىڭدىن يۈز ئۆرۈۋاتىسىلەر.‏
68




مەن ئەڭ ئالىي جامائەت تالاش-تارتىش قىلىشىۋاتقاندا ئۇلارنىڭ ئارىسىدا بولۇپ-ئۆتكەنلەرنى بىلمەيتتىم.‏
69




ماڭا پەقەت مېنىڭ ئاشكارا ئاگاھلاندۇرغۇچى بولغانلىقىم ۋەھىي قىلىنماقتا».‏
70




ئۆز ۋاقتىدا رەببىڭ پەرىشتىلەرگە مۇنداق دېگەن ئىدى: «مەن لايدىن ئىنسان يارىتىمەن.‏
71




مەن ئۇنىڭ شەكلىنى تاماملاپ، ئىچىگە روھىمدىن پۈۋلىگەن چېغىمدا ئۇنىڭغا سەجدە قىلىڭلار».‏
72




شۇنىڭ بىلەن پەرىشتىلەرنىڭ ھەممىسى بىردەك سەجدە قىلدى.‏
73




ئىبلىس سەجدە قىلمىدى. ئۇ ئۆزىنى چوڭ تۇتتى ۋە كافىرلاردىن بولدى.‏
74




ئاللاھ: «ئى ئىبلىس! مەن ئۆز قولۇم بىلەن ياراتقان نەرسىگە سەجدە قىلىشتىن سېنى نېمە توستى؟ تەكەببۇرلۇق قىلدىڭمۇ ياكى ئۆزىنى چوڭ تۇتقۇچىلاردىن بولدۇڭمۇ؟» دېدى.‏
75




ئىبلىس: «مەن ئۇنىڭدىن ياخشى. مېنى ئوتتىن ياراتتىڭ، ئۇنى لايدىن ياراتتىڭ» دېدى.‏
76




ئاللاھ ئىبلىسقا مۇنداق دېدى: «ئۇ يەردىن دەرھال چىقىپ كەت! شۇ ئاندىن ئېتىبارەن قوغلاندىڭ!‏
77




ساڭا جازا ۋە مۇكاپات كۈنىگە قەدەر لەنىتىم ياغىدۇ».‏
78




ئىبلىس: «رەببىم! ئۇنداقتا ئىنسانلار قايتا تىرىلدۈرۈلىدىغان كۈنگە قەدەر ماڭا مۆھلەت بەرگىن» دېدى.‏
79




ئاللاھ مۇنداق دېدى: «سەن مۆھلەت بېرىلگەنلەردىنسەن،
80




مۇئەييەن ۋاقىتنىڭ كۈنىگە قەدەر».‏
81




ئىبلىس مۇنداق دېدى: «سېنىڭ ئىززىتىڭ بىلەن قەسەم قىلىمەنكى، ئۇلارنىڭ ھەممىسىنى ئازدۇرىمەن.‏
82




لېكىن ئۇلاردىن ئىخلاسمەن بەندىلىرىڭنى ئازدۇرالمايمەن».‏
83




ئاللاھ مۇنداق دېدى: «ئۇنداقتا ھەقىقەت- مەن داۋاملىق ھەقىقەتنى سۆزلەيمەن- شۇكى:‏
84




مەن جەھەننەمنى سەن بىلەن ۋە ئۇلاردىن ساڭا ئەگەشكەنلەرنىڭ ھەممىسى بىلەن تولدۇرىمەن».‏
85




ئى مۇھەممەد! ئېيتقىنكى: «مەن بۇ تەبلىغ ئۈچۈن سىلەردىن ھېچقانداق ئەجىر تەلەپ قىلمايمەن. مەن تەكەللۇپ قىلغۇچىلاردىنمۇ ئەمەسمەن.‏
86




بۇ قۇرئان ئالەملەر ئۈچۈن بىر ئەسلىتىشتىنلا ئىبارەتتۇر.‏
87




ئۇنىڭ خەۋەرلىرىنىڭ توغرىلىقىنى بىر مۇددەتتىن كېيىن ئەلۋەتتە بىلىسىلەر».‏
88