بِسْمِ اللهِ الرَّحْمٰنِ الرَّحِيمِ‎

47-سۈرە مۇھەممەد مەدىنەدە نازىل بولغان، 38 ئايەت

كافىر بولغان ۋە ئاللاھنىڭ يولىدىن توسقانلارنىڭ ئەمەللىرىنى ئاللاھ چوقۇم بىكار قىلىۋېتىدۇ.‏
1




ئىمان ئېيتقان، ياخشى ئەمەللەرنى قىلغان ۋە مۇھەممەدكە نازىل قىلىنغان قۇرئانغا- قۇرئان ئۇلارنىڭ رەببىدىن كەلگەن ھەقتۇر- ئىمان كەلتۈرگەنلەر بولسا، ئاللاھ ئۇلارنىڭ يامانلىقلىرىنى يوققا چىقىرىۋېتىدۇ ۋە ھالىنى ياخشىلايدۇ.‏
2




بۇنىڭ سەۋەبى شۇكى، كافىرلار باتىلغا ئەگەشتى. مۇئمىنلار رەببىدىن كەلگەن ھەقكە ئەگەشتى. ئاللاھ ئىنسانلارنىڭ ئەھۋالىنى ئىنسانلارغا مۇشۇنداق بايان قىلىدۇ.‏
3




جەڭ مەيدانىدا كافىرلار بىلەن ئۇرۇش قىلغان چېغىڭلاردا ئۇلارنى قىرىپ تاشلاڭلار. ئاخىرى ئۇلارنى يېڭىپ، قارشىلىق كۆرسىتەلمەيدىغان ھالەتكە كەلتۈرگەن چېغىڭلاردا ئۇلارنى ئەسىر ئېلىپ چىڭ تۇتۇڭلار. ئاندىن ئۇلارنى يا بەدەلسىز قويۇپ بېرىڭلار ياكى فىديە ئېلىپ قويۇپ بېرىڭلار. ئۇرۇش ئۆزىنىڭ ئېغىر يۈكلىرىنى تاشلىغانغا قەدەر شۇنداق قىلىڭلار. بۇ ئىش مانا مۇشۇنداقتۇر. ئەگەر ئاللاھ خالىسا ئىدى، ئۇلاردىن ئىنتىقام ئالاتتى. لېكىن ئاللاھ بەزىڭلارنى بەزىڭلار بىلەن ئىمتىھان قىلىدۇ. ئاللاھ يولىدا ئۆلتۈرۈلگەنلەرگە كەلسەك، ئاللاھ ئۇلارنىڭ ئەمەللىرىنى ھەرگىزمۇ بىكار قىلىۋەتمەيدۇ،
4




ئۇلارنى يېقىندا ھىدايەت قىلىدۇ، ئۇلارنىڭ ھالىنى ياخشىلايدۇ‏
5




ۋە ئۇلارنى، ئۇلارغا تونۇتقان جەننەتكە كىرگۈزىدۇ.‏
6




ئى مۇئمىنلار! ئەگەر سىلەر ئاللاھنىڭ دىنىغا ياردەم بەرسەڭلار، ئاللاھ سىلەرگە ياردەم بېرىدۇ ۋە قەدەملىرىڭلارنى مۇستەھكەم تۇرغۇزىدۇ.‏
7




كافىرلارغا كەلسەك، ئۇلار ھالاك بولىدۇ ۋە ئاللاھ ئۇلارنىڭ ئەمەللىرىنى بىكار قىلىۋېتىدۇ.‏
8




بۇنىڭ سەۋەبى شۇكى، ئۇلار ئاللاھ نازىل قىلغان قۇرئاننى يامان كۆردى. شۇنىڭ بىلەن ئاللاھ ئۇلارنىڭ ئەمەللىرىنى بىكار قىلدى.‏
9




ئۇلار يەر يۈزىدە سەير قىلىپ ئۆزلىرىدىن بۇرۇن ئۆتكەنلەرنىڭ ئاقىۋىتىنىڭ قانداق بولغانلىقىغا قارىمىدىمۇ؟ ئاللاھ ئۇلارنى يىلتىزىدىن قۇرۇتۇۋەتتى. بۇ كافىرلارنىمۇ ئوخشاش ئاقىۋەتلەر ساقلاپ تۇرماقتىدۇر.‏
10




بۇنىڭ سەۋەبى شۇكى، ئاللاھ مۇئمىنلارنىڭ قوغدىغۇچىسىدۇر، كافىرلارنىڭ قوغدىغۇچىسى يوقتۇر.‏
11




ئاللاھ ئىمان ئېيتقان ۋە ياخشى ئەمەللەرنى قىلغانلارنى ئاستىدىن ئۆستەڭلەر ئېقىپ تۇرىدىغان جەننەتلەرگە كىرگۈزىدۇ. كافىرلار بولسا، دۇنيادا كەيپ-ساپا سۈرىدۇ، تۆگە، كالا، قوي ۋە ئۆچكىلەر يېگەندەك يەيدۇ. دوزاخ ئۇلارنىڭ جايى بولىدۇ.‏
12




ئى مۇھەممەد! سېنى ھەيدەپ چىقارغان يۇرتتىن كۈچلۈك نۇرغۇن يۇرتلار بار ئىدى، بىز ئۇ يۇرتلارنىڭ ئاھالىسىنى ھالاك قىلدۇق. ئۇلارنىڭ ھېچ ياردەمچىسى بولمىدى.‏
13




رەببىدىن كەلگەن روشەن دەلىلگە ئاساسلانغان ئادەم بىلەن يامان ئەمەلى ئۆزىگە چىرايلىق كۆرسىتىلگەن ۋە خاھىشلىرىغا ئەگەشكەن ئادەملەر ئوخشاش بولامدۇ؟‏
14




تەقۋادارلارغا ۋەدە قىلىنغان جەننەت مۇنداق: ئىچىدە بۇزۇلمىغان سۇ ئۆستەڭلىرى، تەمى ئۆزگەرمىگەن سۈت ئۆستەڭلىرى، ئىچكۈچىلەرگە لەززەت بېغىشلايدىغان مەي ئۆستەڭلىرى ۋە سۈزۈلدۈرۈلگەن ھەسەل ئۆستەڭلىرى بار. ئۇلار ئۈچۈن ئۇ جەننەتتە ھەر تۈرلۈك مېۋە ۋە رەببىدىن مەغپىرەت بار. بۇ نېمەتلەرگە ئېرىشكەن تەقۋادارلار دوزاختا مەڭگۈ قالىدىغان، قايناق سۇ بىلەن سۇغىرىلغان، قايناق سۇ ئۈچەيلىرىنى پارچە-پارچە قىلىۋەتكەن كىشىلەر بىلەن ئوخشاشمۇ؟‏
15




ئى مۇھەممەد! كافىرلاردىن شۇنداق كىشىلەر باركى، ساڭا قۇلاق سالىدۇ، سېنىڭ يېنىڭدىن ئايرىلىپ چىققان چاغلىرىدا ئىلىم بېرىلگەنلەرگە: «ئۇ بايا نېمە دېدى؟» دېيىشىدۇ. ئەنە شۇلار ئاللاھ قەلبلىرىنى پېچەتلىۋەتكەن، ئۆز خاھىشلىرىغا ئەگەشكەن كىشىلەردۇر.‏
16




ھىدايەت تاپقانلار بولسا، ئاللاھ ئۇلارنىڭ ھىدايىتىنى زىيادە قىلىدۇ ۋە ئۇلارغا تەقۋالىقىنى ئاتا قىلىدۇ.‏
17




ئۇلار پەقەت قىيامەتنىلا- قىيامەتنىڭ ئۆزلىرىگە ئۇشتۇمتۇت كېلىشىنىلا- كۈتۈۋاتىدۇ. شۈبھىسىزكى، قىيامەتنىڭ ئالامەتلىرى كەلدى. ئۇلارنىڭ، ئۆزلىرىگە قىيامەت كەلگەندە ۋەز-نەسىھەت ئالغانلىقىنىڭ نېمىگە پايدىسى بار؟
18




شۇڭا ئاللاھتىن باشقا ئىلاھ يوق ئىكەنلىكىنى بىلگىن، ئۆز گۇناھىڭ ئۈچۈن، مۇئمىن ۋە مۇئمىنەلەرنىڭ گۇناھلىرى ئۈچۈن مەغپىرەت تىلىگىن، ئاللاھ سىلەرنىڭ ھەرىكەت قىلىۋاتقان ۋە ئورۇنلىشىدىغان يېرىڭلارنى بىلىدۇ.‏
19




مۇئمىنلار: «كاشكى بىر سۈرە نازىل قىلىنغان بولسا!» دەيدۇ. لېكىن مەزمۇنى ئىخچام ۋە ئېنىق بىر سۈرە نازىل قىلىنىپ، ئۇنىڭدا ئۇرۇش زىكىر قىلىنسا، سەن قەلبلىرىدە كېسەل بارلارنى ساڭا ئۆلۈمدىن قورقۇپ ئايلىنىپ كەتكەن ئادەمدەك قاراۋاتقان ھالەتتە كۆرىسەن. ھالبۇكى، ئۇلار قىلىشقا تېگىشلىك بولغان ئىش،‏
20




ئىتائەت قىلىش ۋە چىرايلىق سۆز قىلىش ئىدى. ئۇرۇش قارار قىلىنغاندا، ئۇلار ئاللاھقا سادىق بولۇشسا ئۆزلىرى ئۈچۈن ئەلۋەتتە ياخشى بولاتتى.‏
21




دېمەك، سىلەر ئىش بېشىغا ئۆتسەڭلار، زېمىندا بۇزغۇنچىلىق قىلىشنى ۋە تۇغقانچىلىق مۇناسىۋەتلىرىنى ئۈزۈشنى ئارزۇ قىلىسىلەر.‏
22




ئەنە شۇلار ئاللاھ لەنەت قىلىپ، قۇلاقلىرىنى گاس، كۆزلىرىنى كور قىلىۋەتكەن كىشىلەردۇر.‏
23




ئۇلار قۇرئاننى تەدەببۇر قىلمامدۇ؟[1] ياكى ئۇلارنىڭ قەلبلىرى قۇلۇپلانغانمۇ؟‏
24




شۈبھىسىزكى، توغرا يول ئۆزلىرىگە ئېنىق بولغاندىن كېيىن كەينىگە يېنىۋالغانلارنى شەيتان كۈشكۈرتتى ۋە ئۇلارغا ئۈمىد بەردى.‏
25




بۇنىڭ سەۋەبى شۇكى، ئۇلار ئاللاھ نازىل قىلغان قۇرئاننى يامان كۆرگەنلەرگە: «بىز بەزى ئىشلاردا سىلەرگە ئىتائەت قىلىمىز» دېدى. ئاللاھ ئۇلارنىڭ سىرلىرىنى بىلىدۇ.‏
26




پەرىشتىلەر ئۇلارنى يۈزلىرىگە ۋە ئارقىلىرىغا ئۇرغان ھالدا ۋاپات قىلدۇرىدۇ. ئۇ چاغدا ئۇلارنىڭ ھالى قانداق بولىدۇ؟
27




بۇنىڭ سەۋەبى شۇكى، ئۇلار ئاللاھنى غەزەپلەندۈرگەن نەرسىگە ئەگەشتى ۋە ئاللاھنىڭ رازىلىقىنى ياقتۇرمىدى. شۇنىڭ بىلەن ئاللاھ ئۇلارنىڭ ئەمەللىرىنى بىكار قىلدى.‏
28




ياكى قەلبلىرىدە كېسەل بارلار، ئاللاھ بىزنىڭ ئاداۋەتلىرىمىزنى ئوتتۇرىغا چىقارمايدۇ دەپ ئويلامدۇ؟‏
29




ئى مۇھەممەد! ئەگەر خالىغان بولساق، ئۇ مۇنافىقلارنى ساڭا كۆرسىتەتتۇق، سەن ئۇلارنى سېماسىدىن تونۇيتتۇڭ. شۈبھىسىزكى، سەن ئۇلارنى سۆزلىرىنىڭ ئۇسلۇبىدىن تونۇيسەن. ئاللاھ سىلەرنىڭ ئەمەللىرىڭلارنى بىلىپ تۇرىدۇ.‏
30




شۈبھىسىزكى، بىز سىلەرنى ئىچىڭلاردىن جىھاد قىلغۇچىلارنى ۋە سەۋر قىلغۇچىلارنى بىلگەنگە، خەۋەرلىرىڭلارنى ئوتتۇرىغا چىقارغانغا قەدەر سىنايمىز.‏
31




شۈبھىسىزكى، كافىر بولغان، ئاللاھنىڭ يولىدىن توسقان ۋە توغرا يول ئۆزلىرىگە ئېنىق بولغاندىن كېيىن رەسۇلۇللاھقا قارشى تۇرغانلار ئاللاھقا قىلچە زىيان يەتكۈزەلمەيدۇ. ئاللاھ يېقىندا ئۇلارنىڭ ئەمەللىرىنى بىكار قىلىدۇ.‏
32




ئى مۇئمىنلار! ئاللاھقا ئىتائەت قىلىڭلار، رەسۇلۇللاھقا ئىتائەت قىلىڭلار، ئەمەللىرىڭلارنى بىكار قىلىۋەتمەڭلار.‏
33




شۈبھىسىزكى، كافىر بولغان ۋە ئاللاھنىڭ يولىدىن توسقان، ئاندىن كافىر پېتى ئۆلگەن كىشىلەرگە ئاللاھ ھەرگىز مەغپىرەت قىلمايدۇ.‏
34




شۇڭا بوشاڭلىق قىلماڭلار ۋە سىلەر ئۈستۈن تۇرۇقلۇق ئۇلارنى سۈلھىگە چاقىرماڭلار. ئاللاھ سىلەر بىلەن بىللىدۇر. ئاللاھ سىلەرنىڭ ئەمەللىرىڭلارنى ھەرگىز كېمەيتىۋەتمەيدۇ.‏
35




بۇ دۇنيا ھاياتى ئويۇن ۋە بىھۇدە مەشغۇلاتتىنلا ئىبارەتتۇر. ئەگەر ئىمان ئېيتساڭلار ۋە تەقۋادارلىق قىلساڭلار، ئاللاھ سىلەرگە ئەجرىڭلارنى بېرىدۇ ۋە سىلەردىن مال-مۈلكۈڭلارنىڭ ھەممىسىنى تەلەپ قىلمايدۇ.‏
36




ئەگەر ئاللاھ سىلەردىن مال-مۈلكۈڭلارنىڭ ھەممىسىنى قەتئىي تەلەپ قىلسا، بېخىللىق قىلىسىلەر ۋە ئۇ سىلەرنىڭ ئاداۋىتىڭلارنى ئوتتۇرىغا چىقىرىدۇ.‏
37




سىلەر ئەنە شۇنداق كىشىلەركى، ئاللاھنىڭ يولىدا مال سەرپ قىلىشقا چاقىرىلىسىلەر، لېكىن سىلەردىن بەزىلەر بېخىللىق قىلىدۇ. كىم بېخىللىق قىلسا، ئۆزىگە بېخىللىق قىلغان بولىدۇ. ئاللاھ بىھاجەتتۇر، سىلەر موھتاجسىلەر. ئەگەر يۈز ئۆرۈسەڭلار ئاللاھ سىلەرنىڭ ئورنۇڭلارغا باشقا قەۋم كەلتۈرىدۇ. ئاندىن ئۇلار سىلەرگە ئوخشاش بولمايدۇ.‏
38