بِسْمِ اللهِ الرَّحْمٰنِ الرَّحِيمِ‎

69-سۈرە ھاققە مەككەدە نازىل بولغان، 52 ئايەت

ھاققە[1]! ‏
1




ھاققە نېمىدۇر؟‏
2




ھاققە نېمىدۇر، سەن نەدىن بىلىسەن؟‏
3




سەمۇد ۋە ئاد قارىئە[2]نى يالغان دېدى.‏
4




شۇنىڭ بىلەن سەمۇد ھەددىدىن زىيادە پالاكەت[3] بىلەن ھالاك قىلىندى.‏
5




ئاد بولسا سوغۇق ۋە ئاۋازلىق قاتتىق قارا بوران بىلەن ھالاك قىلىندى.‏
6




ئاللاھ ئۇ بوراننى ئۇلارنىڭ ئۈستىگە يەتتە كېچە ۋە سەككىز كۈندۈز ئۈزۈلدۈرمەي چىقاردى. ئەگەر ئۇ يەردە بولغان بولساڭ، ئۇلارنى خورما دەرىخىنىڭ پور كۆتەكلىرىدەك يېقىلغان ھالەتتە كۆرەتتىڭ.‏
7




ھازىر ئۇلاردىن بىرەر قالدۇق كۆرەلەمسەن؟‏
8




شۇنىڭدەك فىرئەۋنمۇ، ئۇنىڭدىن بۇرۇنقىلارمۇ، كۆمتۈرۈۋېتىلگەنلەرمۇ خاتا ئىشلارنى قىلدى.‏
9




ئۇلار رەببىنىڭ ئەلچىسىگە ئاسىيلىق قىلدى، شۇنىڭ بىلەن رەببى ئۇلارنى شىددىتى بارغانچە زىيادە بولىدىغان ئازاب بىلەن جازالىدى.‏
10




ئى ئىنسانلار! تۇفان بالاسى يۈز بەرگەندە سىلەرنى كېمىدە بىز توشۇدۇق.‏
11




بۇ ئۇنى سىلەرگە ئىبرەت قىلىشىمىز ئۈچۈن ۋە ئۇنى[4] تۇتۇۋالىدىغان قۇلاقلارنىڭ تۇتۇۋېلىشى ئۈچۈن ئىدى.‏
12




سۇرنىڭ بىرىنچى قېتىملىق چېلىنىشى چېلىنغان،‏
13




ۋە زېمىن بىلەن تاغلار كۆتىرىلىپ، ئىككىسى قاتتىق ئۇرۇلغان چاغدا،
14




ئەنە شۇ كۈندە بولۇشقا تېگىشلىك ئىش بولىدۇ.‏
15




ئاسمان يېرىلىدۇ، ئاسمان ئۇ كۈندە بوشىشىپ كېتىدۇ.‏
16




پەرىشتىلەر ئاسماننىڭ كانارلىرىدا بولىدۇ. ئۇ كۈندە رەببىڭنىڭ ئەرشىنى ئۇلارنىڭ ئۈستىدە سەككىز پەرىشتە كۆتۈرىدۇ.‏
17




ئۇ كۈنى سىلەر ئاللاھنىڭ ھۇزۇرىغا چىقىرىلىسىلەر، سىلەرنىڭ ھېچبىر مەخپىيىتىڭلار مەخپىي قالمايدۇ.‏
18




ئەمەل دەپتىرى ئوڭ قولىغا بېرىلگەن كىشىگە كەلسەك، ئۇ مۇنداق دەيدۇ: «مانا بۇ مېنىڭ ئەمەل دەپتىرىم، ئېلىپ ئوقۇڭلار!‏
19




مەن ھېسابىمغا مۇلاقات بولىدىغانلىقىمنى بىلەتتىم».‏
20




ئۇ باياشاتچىلىق ئىچىدە ياشايدۇ،‏
21




ئالىي جەننەتتە.‏
22




ئۇ جەننەتنىڭ مېۋىلىرى يېقىندۇر.‏
23




ئۇلارغا: «يەڭلار، ئىچىڭلار، مەززىلىك بولسۇن. چۈنكى سىلەر ئۆتۈپ كەتكەن كۈنلەردە ئەمەل قىلىپ بۇ يەرگە ئەۋەتكەن ئىدىڭلار» دېيىلىدۇ.‏
24




ئەمەل دەپتىرى سول قولىغا بېرىلگەن كىشىگە كەلسەك، ئۇ مۇنداق دەيدۇ: «ئاھ! كاشكى، ماڭا ئەمەل دەپتىرىم بېرىلمىگەن بولسا ئىدى!‏
25




ھېسابىمنىڭ نېمە ئىكەنلىكىنى بىلمىسەم ئىدىم!‏
26




ئاھ! كاشكى، ئۆلۈم ئىشنى ئاخىرلاشتۇرغۇچى بولسا ئىدى!‏
27




مال-مۈلكۈم ماڭا ئەسقاتمىدى.‏
28




سەلتەنەتىم قولۇمدىن كەتتى».‏
29




«ئۇنى تۇتۇڭلار، ئاندىن ئۇنىڭغا تاقاق سېلىڭلار.‏
30




ئاندىن كېيىن ئۇنى دوزاخقا كىرگۈزۈپ ئوتقا قاقلاڭلار.‏
31




ئاندىن كېيىن ئۇنى يەتمىش گەز ئۇزۇنلۇقتىكى زەنجىرگە كىرگۈزۈڭلار[5].‏
32




چۈنكى ئۇ ئۇلۇغ ئاللاھقا ئىشەنمەيتتى،‏
33




مىسكىنگە تائام بېرىشكە تەشۋىقمۇ قىلمايتتى،
34




بۈگۈن بۇ يەردە ئۇنىڭغا ھېچبىر دوست يوقتۇر،‏
35




يىرىڭدىن باشقا تاماقمۇ يوقتۇر.‏
36




ئۇ يىرىڭنى خاتا ئىشلارنى قىلغۇچىلاردىن باشقا ھېچكىم يېمەيدۇ»[6].‏
37




ئۇنداق ئەمەس، مەن سىلەر كۆرۈۋاتقان نەرسىلەر بىلەن قەسەم قىلىمەنكى،‏
38




سىلەر كۆرمەيۋاتقان نەرسىلەر بىلەنمۇ قەسەم قىلىمەنكى،
39




شۈبھىسىزكى، بۇ قۇرئان ھۆرمەتلىك ئەلچىنىڭ سۆزىدۇر[7].‏
40




ئۇ ھەرگىزمۇ شائىرنىڭ سۆزى ئەمەس! بەكمۇ ئاز ئىشىنىسىلەر.‏
41




ئۇ كاھىننىڭ سۆزىمۇ ئەمەس، بەكمۇ ئاز ئويلىنىسىلەر.‏
42




ئۇ ئالەملەرنىڭ رەببى تەرىپىدىن نازىل قىلىنغان.‏
43




ئەگەر ئۇ ئەلچى بەزى سۆزلەرنى ئويدۇرۇپ بىزگە چاپلىسا ئىدى،‏
44




ئۇنى ئوڭ قولىدىن تۇتقان بولاتتۇق،‏
45




ئاندىن كېيىن ئۇنىڭ ئائورتا تومۇرىنى كېسىپ تاشلايتتۇق.‏
46




ھېچبىرىڭلار ئۇنى قوغدىيالمايتتىڭلار.‏
47




شۈبھىسىزكى، قۇرئان تەقۋادارلارغا ئەسلىتىشتۇر.
48




بىز بىلىپ تۇرۇۋاتىمىز، ئاراڭلاردا قۇرئاننى يالغان دېگۈچىلەر بار.‏
49




شۈبھىسىزكى، قۇرئان كافىرلارغا ھەسرەتتۇر.‏
50




شۈبھىسىزكى، قۇرئان قەتئىي ھەقىقەتتۇر.‏
51




ئۇ ھالدا ئۇلۇغ رەببىڭنىڭ ئىسمىنى پاك دەپ ئېتىقاد قىلغىن[8].
52